Informazio interesgarria

Donostia oinezkoentzako pentsatutako hiria da. Erraz ibiliko zara hiriko leku batetik bestera oinez, eta garraio publikoko aukerak ere ugari izango dituzu.

Donostiarrak, batetik bestera, oinez, bizikletaz edo garraio publikoan joan ohi dira. Ba al zenekien, Donostian, 32 milioi bidaia egiten direla, urtean, garraio publikoan, eta kopuru hori urtetik urtera igotzen ari dela? Hiriak, gainera, 77 kilometro ditu bidegorritan, eta hiriko leku nagusien arteko distantziak 15-20 minutuan egiten dira oinez, aldaparik gabe.

Donostiara autoz iristen bazara, aparkatzeko 6.000 plaza baino gehiago ditugu. Aparkalekuak erabili eta garraio publikoan ibil zaitezen gomendatzen dizugu, bereziki, okupazio turistiko handieneko garaietan.

Donostia paseorako gogoa ematen duen hiria da. Pertsonen eskalan diseinatutako hiria da Donostia eta erraz zeharka daiteke oinez, distantzia laburrak, oinezkoentzako eremu zabala eta ibaiertzeko pasealeku zoragarriak, itsas ertzeko, kale eta etorbideen arteko pasealeku ederrak baititu; baita arkitektura miresgarria ere.

Donostia beste modu batean ere ezagut daiteke; hain zuzen, modu desberdin, ekologiko, aktibo eta dibertigarrian. 30 km baino gehiago bidegorritan eta 77 km baino gehiago bizikletak seguru ibiltzeko bide bereizitan (bideen luzera osoaren % 63). Kilometro horiek guztiak erabil ditzakegu hiriaren onena gurpil gainetik ikusteko.

Hiria azkar eta eroso bisitatzeko modua ematen du bizikletak; izan ere, itsasertzeko pasealekuak nahiz erdiguneko kaleak, hiriko txoko guztiak daude bizikleta erabiltzeko egokituta.
Hiriak baditu bizikletak alokatzen dituzten establezimenduak ere.

Donostiako hiribusen zerbitzua osatua eta eraginkorra da eta Dbus konpainiak kudeatzen du. Azkar eramango zaitu hiribusak hiriko punta batetik besteraino. Autobusean bertan ordaindu ahal izango duzu kreditu-txartelaren bidez. Oso erraz kontsulta daitezke autobusak hirian dituen lineak eta egiten dituen ibilbideak, Dbus-en webgunean.

Garraio publikoan are errazago eta merkeago ibili nahi baduzu, eskuratu Donostiako turismo-bulegoetan San Sebastián Card txartel turistikoa. Oso gomendagarria da garraio publikoa erabilita hiri osoa ezagutu nahi duenarentzat; edo eskuratu, bestela, Basque Card txartela, inguruetara ere joan-etorriak egin nahi badituzu. Bi txartelek, gainera, deskontu bikainak eskaintzen dituzte museoetan, jatetxeetan eta saltokietan.

Ordutegiak

Ordutegia aldatu egiten da lineen arabera. Gehienak 07:30 aldera hasten dira eta 22:30ean amaitzen dira. Geltokietan dago adierazita linea bakoitzaren ordutegia eta maiztasuna.

Dbus-ek gaueko autobusen, zerbitzua du, “Gautxori” deitutakoak. Gaueko autobusen linea gehienak 00:00 aldera hasten dira eta 04:00 inguruan amaitzen dira. Gautxori lineak ostiraletan, larunbatetan eta jaiegunen bezperetan bakarrik ibiltzen dira. Guztiek irteera-puntua Donostiako Boulevarden dute.

Pertsonen eskalan sortutako hiri da Donostia eta hiria zeharkatzeko modurik onena autoa aparkatu eta oinez, bizikletaz edo garraio publikoan ibiltzea da.

Hiriak 6.000 aparkaleku baino gehiago ditu honela banatuta:  disuasio-aparkalekua, lur azpiko aparkalekuak eta TAO.

Hiriak berak ezartzen duen erritmoari jarraitzea da Donostiaren erakargarritasunik handiena. Kalerik kale ibiltzea. Pauso bakoitzaz gozatzea, kaleen eta eraikinen harmoniaz eta erakusleihoen estilo eta dotoretasunaz gozatzea; hiriko paisaia aldakorra eta natura pribilegiatua mirestea.

Hartu kontuan plan eta ideia hauek, eta presarik gabe gozatu Donostiaz.

Ondo jaten da hiri honetan!

Donostiak kolore eta zapore guztietako jatetxeak ditu. Eltzekoa edo pintxoak jan ditzakezu, eserita edo zutik, leku dotorean edo herri-ostatu batean. Berdin du… Donostian, sukaldaritzak adierazten du agian hitzez adierazten ez dakiguna. Pintxo eta Plater bakoitzak bere lengoaia du, eta horren bidez saiatzen gara ahaztu ezingo dituzun emozio bereziak transmititzen.

Gabonetan (Gabon gauean, Eguberri egunean, Urtezahar gauean, Urteberri egunean…) donostian afaldu edo bazkaldu nahi duzu? Egun hauetan irekiak egongo diren jatetxe batzuen zerrenda duzue hemen.

Irisgarritasun fisiko handia

Donostia, aniztasun funtzional fisikoa dutenentzako hiri erosoa

Aniztasun funtzional fisikoa baduzu, Donostiako xarmez gozatu ahalko duzu modu eroso eta errazean, hiriko irisgarritasun handiari esker.

Donostiako hiri-ingurunea laua da nagusiki, eta hauek guztiak ditu: espaloi zabalak eta beheratuak, irtengunerik gabeko zoladurak eta igogailuak kota-aldea dagoen zonetan, besteak beste. Horrez gain, mugikortasun urriko pertsonentzako aparkaleku eta komun publiko egokitu ugari daude.

Halaber, erraz mugi zaitezke garraio publikoz: bai Dbus hiriko autobus-sistemak, bai Lurraldebus hiriarteko autobus-zerbitzuek edo Euskotren tren-zerbitzuek mugikortasun urriko pertsonentzako sartzeko arrapalak eta eserleku erreserbatuak dauzkate, besteak beste.

Horrez gain, Autobus Turistikoak eta Tren Turistikoak gurpil-aulkia erabiltzen dutenentzako eserleku bana dute, eta taxi-enpresek ibilgailu egokituak dituzte.